АҚШ махсус хизматлари собиқ ходими Эдвард Сноуден Норвегия ҳукуматидан маҳаллий ПЕН-клубнинг унга сўз эркинлигига қўшган ҳиссаси учун ажратилган мукофотни олиш учун Норвегияга борганида, уни Америка ҳукуматига топширмасликлари учун кафолат олишга уринишда давом этади, деб ёзади «ТАСС».
Норвегия ПЕН-клуби тарқатган хабарга кўра, мамлакат Олий судига Сноуденнинг номидан қиролликнинг иккита қуйи суд органи қарорига қарши апелляция берилган, улар аввалроқ унинг Норвегия давлатига қарши даъвосини кўриб чиқишдан бош тортган эди.
«Агар адлия ва жамоат хавфсизлиги вазирлиги Сноуденга 2016 йилги Осецкий мукофотини олиш учун эркин келиб-кетишига йўл қўймаса, бу ҳуқуқий давлат сифатида Норвегия учун шармандалик бўлади», — деди Норвегия ПЕН-клуби президенти Вильям Нюгор.
Унинг аниқлик киритишича, Олий судда ишни кўриб чиқиш муддатлари Сноуденга мукофотни режалаштирилгани каби 18 ноябрда топшириш имконини бермайди. Бунинг ўрнига, Сноуден Осло Адабиёт уйида видеоалоқа орқали омма олдида нутқ сўзлайди. Мукофотни топшириш маросимининг ўзи эса лауреат уни шахсан қабул қила олиши мумкин бўлган вақтга қолдирилади. Ҳозирча у 2017 йил 7 июнга кўчирилди.
Изоҳ (0)