Ўзбекистон Бадиий академиясининг Камолиддин Беҳзод мемориал боғ-музейида «Асрлар оша барҳаёт санъат» деб номланган кўргазма ташкил этилди. Унда Ўзбекистон Бадиий академияси академиги, Ўзбекистон халқ устаси Алишер Нарзуллаевнинг ижод намуналари томошабинлар эътиборига ҳавола этилди, деб хабар беради ЎзА.
Ўзбекистон Бадиий академияси раиси ўринбосари Ф. Тошмуҳамедов тадбирда чиқиш қилди.
А. Нарзуллаевнинг ижодий ишлари Ўзбекистонда ва хорижда яхши маълум. У Ғиждувон кулолчилик мактаби анъаналари ривожига муносиб ҳисса қўшиб келаётган ижодкорлардан. Устанинг нафис ижод намуналари Ўзбекистон, АҚШ, Франция, Германия, Япония ва бошқа давлатларда ўтказилган бир қатор кўргазмалар, кўрик-танловлар, санъат фестивалларида юқори баҳоланган. Моҳир кулолдан касб сирларини ўрганган ижодкорлар бугунги кунда мамлакатдаги бир қатор ижодий ташкилот ва бирлашмаларда меҳнат қилмоқда.
Ғиждувон кулолчилиги нақш ва чизгиларининг яхлит ва кўркамлиги, мукаммаллиги, оловранг, тўқ қизғимтир, сариқ, зумрад каби рангларнинг самарали қўлланилиши билан санъат мухлисларининг эътиборини қозонган. Бу жиҳатлар А. Нарзуллаевнинг ижод намуналарида ҳам яққол кўзга ташланади.
Кўргазмада моҳир устанинг икки юздан ортиқ кулолчилик иши намойиш этилмоқда.
Изоҳ (0)