Санкт-Петербургда харидор iPhone 6S’ни ушлаб кўришни сўради ва уни совун билан алмаштириб қўйди
Россиянинг Санкт-Петербург шаҳридаги Савушкина кўчасида жойлашган телефон дўконларидан бирида 42 ёшли эркак iPhone 6S смартфонини ушлаб кўришни сўради ва уни совун билан алмаштириб қўйди. Бу ҳақда TJournal хабар бермоқда.
Ҳодиса 2 октябрь куни содир бўлди. Петрозаводск фуқароси телефон дўконига кириб, 32 ёшли аёл сотувчидан iPhone 6S’ни ушлаб кўришни сўради. Смартфон пештахтада бўлмагани сабаб сотувчи қурилмани қутиси билан олишга мажбур бўлди.
Эркак смартфон ва унинг аксессуарларини кўриб чиққунига қадар аёл сотувчи бироз чалғиди ва харидор сездирмасдан худди шундай iPhone 6S қутисини ичида совуни бор қути билан алмаштириб қўйди.
Шундан сўнг эркак гўёки паспортини машинада қолдирганини эслади ва дўконни тезда тарк этди. Харидор Санкт-Петербургнинг бошқа ҳудудидаги бозорлардан бирига йўл олиб, iPhone 6S’ни сотиб юбормоқчи бўлди.
Тез орада жиноятчи қўлга олинди. У смартфонларни алмаштирганини тан олди ва шаҳардан чиқмаслик ҳақида тилхатга қўл қўйди.
42 ёшли эркакка нисбатан товламачилик юзасидан жиноят иши очилди.
