Ўзбекистон — Эрон. Форс нашри Карлуш Кейруш жамоаси Ўзбекистонни енга олмаслиги ҳақида ёзди

Эроннинг Team Melli нашри мамлакат бош жамоасининг ЖЧ—2018 йўлидаги Ўзбекистонга қарши ўйини олдидан танқидий мақола чоп этди ва унда бош мураббий Карлуш Кейруш ҳақида кескин фикрлар билдирди. Мақоланинг ўзбекча варианти «Championat.asia» сайтида келтирилди.

Унда Эрон термаси ўз мухлисларини ҳафа қилмаслик ва танқидчиларга мавзу топиб бермаслик учун ҳам ўз устида ишлаши кераклиги ёзилган. Боиси форс футболчилари Қатар ва Хитойга қарши аввалги икки учрашувда имкониятлардан фойдаланишда оқсаган.

Қатарга қарши ўйинда Эрон гол уриши учун рақибнинг жуда қўпол хатоси керак бўлди. Ўша куни форслар омад келгани учунгина ғалаба қозонгани мақолада айтиб ўтилган. Хитойга қарши беллашувда шундай хатолар ва омад йўқлиги боис Эрон гол ура олмаган.

Рақиблар Эрон ўйинини етарли даражада ўргангани кўринди. Эронлик футболчиларда эса рақиб ҳимоясини ёриб ўтиш учун ғоялар тугаб қолгандек, деб ёзилган Team Melli’да. Сардор Азмунга оширилаётган тўпларни рақиб футболчилар осонгина эгаллаб олаётгани Карлуш Кейруш термани Али Дайига топширадиган вақт келганига ишора қилмоқда.

Кейрушнинг энг нўноқ томони сифатида ҳимояни ёриб ўтиш учун қўшимча режалари йўқлиги таъкидланган. Узоқ масофадан бериладиган зарбалар икки ўйинда ҳам фойда бермади. Хатто айрим мухлислар қийшиқ тепилган тўпларни уйларига совға сифатида олиб кетишди, деб ёзилган мақолада.

Эрон терма жамоасида ҳужум қилишнинг ягона услуби бор — қанотлардан ҳужумга ўтиш. Бу фалсафа 180 дақиқадан бери фойда бермаяпти. Яхши ташкил этилган, кучли ва бўйдор футболчилари бор бўлган Ўзбекистонга қарши бундай услубнинг самара бермаслиги аниқ, деб кўрсатилган.

Мураббий ер ва ҳавони айблайвермасдан, ўз стратегиясини ўзгартириши керак. Ҳамма ўйинларда битта ўйин услуби фойда бермайди, бу таваккалдан бошқа нарса эмас.

Кейруш ОАВ, футболи раҳбарлари ёки мухлислар билан тинимсиз жанжал қилади. Ўзи ҳақида ёмон таассурот қолдиришдан чарчамайди. У ўзини бошқара олмаслиги учун ҳам Қатарга қарши ўйинда 4 нафар футболчи сариқ карточка билан жазоланди, деб ёзилди рисолада.

Маълумот учун, Ўзбекистон ва Эрон термалари ўртасидаги ЖЧ—2018 саралаш ўйини 6 октябрь куни 18:00 да «Бунёдкор» стадионида бошланади.