Британиялик боксчи Тайсон Фьюри кокаин истеъмол қилганини тан олди
Бокс бўйича супероғир вазн тоифасида WBA ва WBO версиялари бўйича жаҳон чемпиони ҳисобланган британиялик Тайсон Фьюри кокаин гиёҳванд моддасини қабул қилганини тан олди. Бу ҳақда Rolling Stone хабар бермоқда.
«Мен ҳаётим давомида кўп ишларга қўл урганман. Кўп кокаин истеъмол қилганман. Нима учун мен уни истеъмол қила олмайман? Бу менинг ҳаётим, шундай эмасми? Мен истаган ишимни қилишим мумкин», – деди Фьюри.
Фьюрининг таъкидлашича, у кокаинни натижаларни яхшилаш учун истеъмол қилмаган.
«Мен кокаинни бир неча ой олдин истеъмол қилишни бошладим. Бошқа ҳеч қандай моддаларни қабул қилмаганман», – деб қўшимча қилди боксчи.
Эслатиб ўтамиз, Тайсон Фьюрининг 22 сентябрь куни топширган допинг тестида кокаин излари аниқланганди. Кейинроқ спортчи барча чемпионлик камарларидан маҳрум этилиши мумкинлиги хабар қилинган эди.
28 ёшли боксчи 3 октябрь куни фаолиятини якунлаши ҳақида маълум қилди. Бир неча соатдан кейин у спортдан кетаётгани ҳақидаги хабари ҳазил эканини айтди.
Қайд этиш жоизки, бундан аввал Тайсон Фьюри украиналик Владимир Кличкога қарши ўтиши керак бўлган реванш жангини кетма-кет иккинчи марта бекор қилди.
