Тошкент вилоятида 874 сайлов участкаси тузилди
Ўзбекистон Президенти сайловини ўтказувчи 10-Тошкент вилояти округ сайлов комиссиясининг мажлиси бўлиб ўтди. Бу ҳақда ЎзА хабар бермоқда.
Округ сайлов комиссияси аъзолари, сайлов комиссияси қошидаги матбуот маркази ходимлари, журналистлар иштирок этган мажлисда сайловни ўтказувчи Тошкент вилояти сайлов округи ҳудудида сайлов участкаларини тузиш, уларнинг аъзоларини шакллантириш, сайлов участкаларини жиҳозлаш масалалари муҳокама қилинди.
«Ўзбекистон Республикаси Президенти сайлови тўғрисида»ги қонуннинг 10 ва 11-моддаларига мувофиқ туман ва шаҳарлар ҳокимликлари томонидан сайлов участкаларини тузиш тўғрисида округ сайлов комиссиясига тақдимномалар келиб тушди. Ҳудудда президентлик сайловини ўтказувчи 874 сайлов участкаси тузилди.
Мажлисда участка сайлов комиссияларини давлат рамзлари, зарур мебель жиҳозлари, алоқа воситалари, оргтехника анжомлари, комиссия фаолиятини ёритувчи стендлар билан тўлиқ таъминлаш, сайлов участкаси биноси ва участка комиссияси аъзолари учун ажратилган хоналар ҳолати, улар жойлашган ҳудудларни ободонлаштириш масалалари муҳокама қилинди.
Шу куни оммавий ахборот воситалари ходимлари учун брифинг ташкил этилди. Унда журналистларга вилоятда сайловни ўтказишга тайёргарлик ишларининг бориши ҳақида атрофлича маълумот берилди.
