Дунёдаги энг бахтли шаҳардан фоторепортаж

Жанубий Корея пойтахти Сеул — дунёдаги энг бахтли шаҳар, деб ёзади AdMe.

Қаерда истиқомат қилиш афзал эканлигини аниқлаш учун жаҳоннинг 100 та йирик шаҳрини ўрганиб чиққан Arcadis лойиҳа-консалтинг фирмаси шундай хулосага келди.

Сеулда даромадлар ўртасидаги фарқ кўрсаткичи жуда кичик, жиноятчилик минимал даражада, аҳоли эса мустаҳкам саломатлиги билан ажралиб туради.

Сеул маҳаллий аҳоли ҳам, хорижлик меҳмон ҳам куну тун ўзини бехатар ҳис этиши мумкин бўлган камсонли мегаполислардан бири. Ваҳоланки, шаҳарда 10 миллион одам истиқомат қилади.

Жанубий Корея ҳукумати фуқароларнинг саломатлиги ва таълим олиши борасида қайғуради. Бу соҳалардаги юқори кўрсаткичлар Сеулнинг дунё шаҳарлари орасида биринчи ўринга кўтарилишига имкон берди.

Сўнгги пайтларда Сеул аста-секин «ақлли шаҳар»га айланиб бормоқда. Камхарж фуқаролар шаҳарнинг юқори тезликдаги симсиз тармоқларига уланиш имконига эга бўлиши учун ишлатилган смарт-қурилмалар бепул тарқатилмоқда.

Сеулда интеллектуал видеокузатув камералари ва юқори технологик кўча чироқлари ёнма-ён ўрнатилган — бу чироқлар нафақат кўчани ёритади, балки аудиони трансляция қилиш ва интернетга кириш имконини ҳам беради.