Европа тиллари куни яна бир бор Ўзбекистон Давлат жаҳон тиллари университетида нишонланади. Бу ҳақда «Дарё»га университет матбуот хизмати хабар берди.
Тадбир ташаббускорлари қаторида Франция элчихонаси Британия Кенгаши, Гёте Институти ва Ўзбекистондаги Европа Иттифоқи делегацияси билан биргаликда Европа миллий маданий институтлар тармоғи (EUNIC) раҳбарлигида байрамда фаол иштирок этади.
Европа Кенгаши 2001 йилдан бошлаб ҳар йили 26 сентябрни Европа тиллари куни сифатида нишонлаб келмоқда. Шу куни дунё бўйлаб миллионлаб инсонлар хорижий тилларни ўрганишга бағишланган ҳамда тиллар хилма-хиллигини тарғиб этувчи тадбирларда иштирок этади. Бу йил Европа тиллари куни Тошкент шаҳрида 30 сентябрда, Ўқитувчи ва мураббийлар куни арафасида нишонланмоқда.
Ўзбекистонда ҳам кенг нишонланиб келаётган Европа тиллари куни ёшлар ва чет тиллари ўқитувчилари ўртасида йилдан йилга оммабоп тус олмоқда. Тадбирдан кўзланган мақсад — дунёдаги тил ва маданиятлар хилма-хиллигига эътибор қаратиш.
Тадбирни дипломатик миссияларнинг вакиллари ўз она тилларида бир неча оғиз сўз билан тантанали равишда очиб беради. Очилиш маросимидан сўнг «Ўзбекистонда Европа тиллари кунига бағишланган видеоклип» танловида иштирок этган ўқувчи ва талабалар томонидан тайёрланган видеоклиплар кетма-кетлиги намойиш қилинади.
Европа Иттифоқи делегацияси, Франция элчихонаси, Гёте Институти, Британия Кенгаши, Тошкент Француз альянси ҳамда Германия, Буюк Британия, Украина, Грузия, Чехия Республикаси, Польша, Руминия, Словакия, Швейцария, АҚШ элчихоналари Европа тиллари куни байрамида иштирок этади. Бир неча юзлаб талабалар ва ўқитувчилар тадбирда қатнашиши кутилмоқда.
Изоҳ (0)