Венесуэла нефть вазири қора олтин нархи 20 доллардан тушиб кетиши мумкинлигидан огоҳлантирди

Жазоирда ўтадиган учрашувда энг йирик нефть қазиб олувчи давлатлар вакиллари бозордаги хатти-ҳаракатларини мувофиқлаштириш борасида келишувга эриша олмаса, нефтнинг бир баррели нархи 20 доллардан ҳам тушиб кетиши мумкин. Бу ҳақда Венесуэла нефть ва тоғ-кон саноати вазири Эулохио дель Пино баёнот берди, деб маълум қилади «РБК».

«Биз Саудия Арабистони ва Эрон билан доимий алоқадамиз, нарх фожиасининг олдини олишга уринмоқдамиз. Агар келишувга эришмасак, нарх урушига кириб қоламиз, унинг давомида эса нархлар баррели учун 20 доллардан пастроққа ҳам тушиб кетиши мумкин», — деди у Russia Today нашрига берган интервьюсида.

Илгарироқ Bank of America нефть бозорида нарх урушини давом эттириш бефойдалигини айтиб ўтган эди.