2016 йилнинг 5 август куни Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди. Бу ҳақда ЎзА хабар бермоқда.

Депутатлар жамият ҳаётининг турли соҳаларида амалга оширилаётган ислоҳотларни янада чуқурлаштиришга, фуқароларнинг ҳуқуқлари, эркинликлари ва қонуний манфаатларини ҳимоя қилишга қаратилган бир қатор қонун лойиҳаларини кўриб чиқди.

Мажлис «Ёшларга оид давлат сиёсати тўғрисида»ги қонун лойиҳасининг муҳокамаси билан бошланди. Депутатлар қонун лойиҳасининг қабул қилиниши ёшларнинг ҳуқуқ ва қонуний манфаатларини мустаҳкамлаш, ёшларга оид давлат сиёсатини амалга оширишда давлат органлари ва бошқа ташкилотларнинг масъулиятини кучайтириш, ушбу соҳада қабул қилинаётган чора-тадбирлар самарадорлигини ошириш имконини беришини таъкидлади.

Шундан кейин депутатлар эътиборига «Ички ишлар органлари тўғрисида»ги қонун лойиҳаси тақдим этилди. Қонун лойиҳасида ички ишлар органларининг асосий вазифа, фаолияти йўналишлари ва принциплари ҳамда уларнинг ваколат ва мажбуриятлари, шунингдек, ушбу идораларда хизмат ўташ тартиби ва шартлари, ходимларнинг хуқуқий ва ижтимоий ҳимояси яхлит ҳужжатда мужассам этилаётганлиги билан муҳим аҳамият касб этади. «Ички ишлар органлари тўғрисида»ги қонун лойиҳасидаги таклиф этилаётган нормалар эркинлик, адолат, қонун устуворлиги каби ижтимоий қадриятларни демократик ҳуқуқий давлат қуриш жараёнига сингдиришда муҳим аҳамият касб этади. Қонун лойиҳасида айнан ҳуқуқий тартибга солишнинг хорижий ва миллий тажрибаси инобатга олинганлиги алоҳида эътироф этилди.

Депутатлар янги таҳрирдаги «Ўсимлик дунёсини муҳофаза қилиш ва ундан фойдаланиш тўғрисида»ги қонун лойиҳасини ҳам муҳокама қилди. Муҳокама жараёнида депутатлар мазкур қонун лойиҳаси ҳуқуқни қўллаш амалиётининг таъсирчанлигини ошириш ва қонун ҳужжатларидаги айрим камчиликларни бартараф этиш нуқтаи назаридан янги таҳрирда ишлаб чиқилганлигини алоҳида қайд этди. Қонун лойиҳаси биологик хилма-хилликнинг ажралмас қисми сифатида ёввойи ҳолда ўсувчи ўсимликлар генофонди комплекс равишда муҳофаза қилинишини таъминлашни назарда тутади. Қонун лойиҳасида давлат органларининг ваколатлари аниқ кўрсатилган ва ушбу соҳадаги муносабатларни тартибга солиш юзасидан уларнинг вазифалари белгилаб берилмоқда. Ўсимлик дунёсини муҳофаза қилиш ва ундан оқилона фойдаланишга қаратилган таъсирчан чора-тадбирларни амалга оширишда фуқароларнинг ўзини ўзи бошқариш органлари, нодавлат нотижорат ташкилотлари ва фуқароларнинг иштирок этишига оид нормаларни мустаҳкамлаб қўйиш лозимлигига эътибор қаратилган.

Мазкур ҳуқуқий ҳужжатлар лойиҳасини муҳокама қилишда барча сиёсий партиялар фракциялари ва Ўзбекистон Экологик ҳаракати депутатлар гуруҳи вакиллари иштирок этди ва ўз муносабатларини билдирди.

Муҳокамалар якунларига кўра тегишли қарорлар қабул қилинди. Депутатлар мажлис кун тартибидаги бошқа масалаларни ҳам кўриб чиқди.