Россия оғир атлетика терма жамоаси Рио–2016 Олимпиада ўйинларидан четлатилди

Оғир атлетика бўйича Россия терма жамоаси Рио–2016 Олимпиада ўйинларидан четлаштирилди. Бу ҳақда Халқаро оғир атлетика федерацияси (IWF) ўз сайтида маълум қилди, деб хабар бермоқда «Газета.ru».

Рио–2016 Олимпиада ўйинларида 8 нафар россиялик оғир атлетикачи иштирок этиши керак эди. Россиялик аёл оғир атлетикачиларнинг йўлланмалари Албания, Грузия ва Молдавия вакилларига берилади. Эркакларнинг квотаси эса Бельгия, Хорватия, Сальвадор, Мўғулистон ва Сербия вакилларига тарқатилади.

• Тўрт нафар россиялик оғир атлетикачининг Лондон–2012 Олимпиадасидаги допинг намуналари ижобий чиқди

Халқаро оғир атлетика федерацияси Ричард Макларен бошчилигидаги Бутунжаҳон антидопинг агентлиги (WADA)нинг мустақил комиссияси ҳисоботини диққат билан ўрганиб, Халқаро олимпия қўмитасининг қарорини, шунингдек, 2008 ва 2012 йилги Олимпиада ўйинларининг допинг-намуналарни қайта текшириш натижаларини инобатга олган ҳолда Россия оғир атлетика федерациясини Рио–2016 дан четлаштиришга қарор қилди.

• Times: ХОҚ янги қайта текширувдан сўнг россиялик спортчиларнинг допинг намуналари ижобий чиққанини аниқлади

Халқаро оғир атлетика қайта текширувдан сўнг камида етти нафар россиялик спортчининг допинг-намунаси ижобий натижа берганини ҳамда спортчиларнинг сони якуний эмаслигини тасдиқлади.