ТАТУда кореялик ҳамкорлар билан «Android тизимидаги дастурий маҳсулотлар» мавзусида семинар-тренинг бўлиб ўтди

Тошкент ахборот технологийлари университети (ТАТУ) ва Корея транспорт миллий университети (KNUT) ўртасида тузилган англашув меморандумига асосан, 1–15 июль кунлари 11 кишидан иборат (2 нафар профессор раҳбарлигида 9 нафар талаба) кўнгиллилар делегацияси ТАТУга ташриф буюрди. Бу ҳақда университет матбуот хизмати «Дарё»га хабар берди.

Ташриф давомида кореялик кўнгиллилар томонидан талабалар учун Android операцион тизимида ишловчи мобил дастурлар яратиш мавзуларига оид тренинг курслари ташкил этилди. Ушбу тренинг курсларида ТАТУ, Тошкент шаҳридаги Инҳа университети ҳамда ТАТУ қошидаги академик лицей ўқувчиларидан иборат 30 нафар талаба қатнашди.

Тадбирнинг сўнгги кунида «Android тизимидаги дастурий маҳсулотлар» кўргазмаси бўлиб ўтди. Кўргазмага Корея транспорт миллий университетидан 4 та, Тошкент ахборот технологиялари университетидан 5 та, Тошкент шаҳридаги Инҳа университети ва ахборот коммуникация технологиялари соҳасидаги касб-ҳунар коллежлари ҳамда ТАТУ қошидаги академик лицей ўқувчилари томонидан яратилган 6 та дастурий маҳсулот қўйилди. Кўргазмада иштирок этган коллеж ўқувчилари томонидан тайёрланган лойиҳалар ичидан 1-ўринни Fast kafe лойиҳаси, 2-ўринни XWING Runner лойиҳаси, 3-ўринни қолган лойиҳалар эгаллади.

Университет раҳбарияти Корея транспорт миллий университети вакиллари билан келгусида ушбу ўқув тренинг-семинар ва кўргазма тадбирларини давом эттиришни келишиб олди.