Туркия мудофаа вазири Фикри Ишик ҳарбий тўнтаришнинг олди олингани, мамлакатнинг барча ҳудуди ҳукумат назорати остига ўтганини маълум қилди. Бу ҳақда Reuters агентлигига таяниб, «Газета.ru» хабар бермоқда.
Аммо Ишик тўнтариш хавфи бутунлай йўқ қилингани ҳақида гапиришга эрта эканлигини айтиб, ҳукумат тарафдорларини «яна кўчаларни эгаллаш»га чақирди.
16 июлга ўтар кечаси Туркияда ҳарбий тўнтаришга уриниш юз берди. Ҳодиса натижасида сўнгги маълумотларга кўра, 265 киши ҳалок бўлди, 1,1 мингдан ортиқ одам яраланди. Ҳалок бўлганлардан 161 нафари ҳукумат тарафдорлари ва тинч аҳоли вакилларидир.Туркия ҳукумати бутун мамлакат бўйлаб исёнчиларнинг 3 мингга яқин тарафдорини қўлга олди. Ҳибсга олинган турк аскарлари ҳарбий тўнтаришни дастлаб оддий машғулот деб тушунганини маълум қилди.
Исёнчиларнинг етакчиси Акин Ўзтурк ҳам қўлга олингани ҳақида хабар берилди. Ражаб Тоййиб Эрдўғон ҳарбий тўнтаришни АҚШда истиқомат қилаётган собиқ имом Фатҳуллоҳ Гулен уюштирган бўлиши мумкинлигини тахмин қилмоқда. Фатҳуллоҳ Гуленнинг ўзи эса барча айбловларни рад этди.
Изоҳ (0)