«Ўзбекистон» телеканалида 30 июнь, пайшанба куни чинозлик Аҳмадбой номи билан танилган Аҳмаджон Турсунбоевнинг ноқонуний фаолиятига бағишланган «Аҳмад васвасаси» кўрсатуви эфирга узатилди.
Кўрсатувда маълум қилинишича, Аҳмаджон Турсунбоев ўзининг ноқонуний фаолияти билан бир неча йиллардан бери шуғулланиб келган, фаолиятининг кўлами «бир неча ўн минг кишини» қамраб олган. Кўрсатув давомида Аҳмаджон Турсунбоев ўзи «қурган» молиявий пирамидага айнан қанча одам жалб этилганини билмаслигини тан олди.
Кўрсатув давомида Аҳмаджон Турсунбоевнинг фаолиятидан жабрланган шахсларнинг интервьюлари, шунингдек, ўқитувчи Бахтигул Бегайдарованинг мурожаати ҳам эълон қилинди.
«Дарс ўтаман, ўқувчиларга: ‘Ҳалол бўлинглар, яхши ўқинглар’, дейман. Бир ўқувчи айтади: ‘Устоз, ўқи-ўқи деяверманг! Минг сўминг бўлса, Аҳмадбойга бериб қўйсанг, еб ётасан. Фалончига қаранг — уй қуриб олди, унисига қаранг — Captiva миниб олди’. Бу каби гапларни ҳозир бешинчи—олтинчи синф ўқувчилари айтяпти. Мана шу Аҳмадбойнинг дастидан ўқувчиларни ўқиш, меҳнат қилиш қизиқтирмай қўйди», — дейди чинозлик ўқитувчи Бахтигул Бегайдарова.«Шундай ҳолат юзага келишида мен кимни айблайман? Биринчидан, виждонсиз, мансабхўр шахсларни! Ҳоким, ички ишлар бўлими нега шу кунгача буларни текширмади? Оддий халқ вакили кўчанинг бир чеккасида ‘перашка’ сотиб ўтирса, солиқчи дарров югуриб келади: ‘Нега сотяпсан?’, деб. Нима учун Аҳмадбойни ҳеч ким ушламади? Шу вақтгача уни тўхтатишганида эди, шунча халқ қақшаб қолмас эди», — дея қўшимча қилди Бахтигул Бегайдарова.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)