Россия президенти Владимир Путин ва Ўзбекистон Президенти Ислом Каримов 24 июнь куни Тошкентда атоқли рус шоири Александр Сергеевич Пушкин ҳайкали қад ростлаган майдонга ташриф буюрди, дея хабар бермоқда ЎзА.
Ўзбекистон Президенти Ислом Каримов ва Россия президенти Владимир Путин Пушкин ҳайкали пойига гул қўйди.
Майдонда амалга оширилган ободонлаштириш ва кўкаламзорлаштириш ишлари олий мартабали меҳмонда катта таассурот қолдирди. Россия президенти Ўзбекистонда жаҳон адабиётининг буюк намояндалари қатори Александр Сергеевич Пушкин ижоди, адабий мероси юксак қадрланиши, шоир хотирасига бунёд этилган ёдгорлик икки мамлакат халқлари ўртасидаги азалий дўстлик муносабатларининг ёрқин ифодаси эканини таъкидлади.
Владимир Путин Ўзбекистонга ташрифи ғоят самарали бўлганини алоҳида таъкидлаб, самарали музокаралар учун Президент Ислом Каримовга самимий миннатдорлик билдирди. Ўзбекистоннинг Шанхай ҳамкорлик ташкилотига раислиги даврида ташкилот фаолиятини янада фаоллаштириш бўйича Ўзбекистон амалга оширган ишларга юксак баҳо берди. Ишчанлик руҳида ўтган Тошкент саммити ШҲТ давлатлари ўртасидаги ҳамкорликни янада ривожлантириш, уни янги мазмун билан бойитишга хизмат қилишини алоҳида қайд этди.
ЎзАнинг қайд этишича, Тошкент халқаро аэропортида Россия президенти Владимир Путинни Ўзбекистон Президенти Ислом Каримов кузатиб қўйди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)