Рақобат қўмитаси Тошкент супермаркетларидан бирида сотилаётган қаймоқда ичак таёқчасини аниқлади

Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитаси «Хосиятли қут-барака» МЧЖнинг сифатсиз сут маҳсулотлари ишлаб чиқарилиши ва сотилишига чек қўйди. Бу ҳақда қўмита матбуот хизмати хабар берди.

Шу йилнинг февраль ойида Давлат рақобат қўмитасига Тошкент шаҳрининг Чилонзор туманида яшовчи фуқаро томонидан Тошкент шаҳри Себзор кўчасида жойлашган Sunday супермаркетидан қаймоқ харид қилгани ва ушбу қаймоқ сифатига шубҳа туғилганлиги муносабати билан Олмазор туман Давлат санитария эпидемиология назорати марказида бактериологик таҳлилдан ўтказиш учун юборгани маълум қилинди.

Таҳлил натижасида олинган намуналар таркибида ичак таёқчаси гуруҳига мансуб бўлган бактерия борлиги аниқланди. Ушбу масала зудлик билан Давлат рақобат қўмитаси, «Дарвоза савдо» МЧЖ ва «Хосиятли қут-барака» МЧЖ ходимлари билан ҳамкорликда ўрганиб чиқилди.

Натижада, «Дарвоза савдо» МЧЖга тегишли барча Маcrо ва Sunday супермаркетлари пештахталаридан «Хосиятли қут-барака» МЧЖ томонидан ишлаб чиқарилган барча сут маҳсулотлари масала ҳал бўлгунга қадар сотувдан вақтинча олиб қўйилди. Шу билан бирга, ишлаб чиқарувчи корхонада Давлат санитария эпидемиология назорати маркази томонидан қисқа муддатли текширув ўтказилиб, аниқланган камчиликлар сабабли корхонанинг ишлаб чиқариши вақтинча тўхтатилди ва корхона раҳбарига нисбатан маъмурий жарима қўлланилди.