Қирғизистон ички ишлар вазири Мелис Турганбаев истеъфо бериш ҳақидаги қарори фақат дам олиш истаги билан боғлиқ эканлигини маълум қилди. Бу ҳақда «РИА Новости» хабар бермоқда.
«Ҳар бир киши лавозимдан кетиш ҳуқуқига эга. Ҳеч қандай сиёсий сабаблар йўқ. Дам олишни истайман, ахир олти йил давомида таътилда бўлмабман», — дея таъкидлаган Турганбаев.
30 май, душанба куни Қирғизистон президенти Алмазбек Атамбаев ўз фармони билан 2014 йил октябридан бери мазкур лавозимни эгаллаб келаётган Турганбаев истеъфосини қаноатлантирди. Охирги икки йил давомида Бишкек шаҳар ички ишлар бошқармаси бошлиғи бўлиб ишлаб келган генерал-майор Қашқар Жунушалиев вазир вазифасини бажарувчи этиб тайинланди. Унинг номзоди парламентга тақдим этиш учун бош вазирга юборилди.
Изоҳ (0)