Ироқ қўшинлари ва кўнгиллилар Ал-Фаллужа шаҳрини ўраб олди

Ироқ қўшинлари ва сунний кўнгиллилар Бағдоддан 50 километр узоқликдаги Ал-Фаллужа шаҳри атрофини тўлиқ назорат қилмоқда. Бу ҳақда тезкор штаб бошлиғи Абдул Амир аш-Шимарий маълум қилди, дея хабар беради «ТАСС».

«Қўшинлар шаҳарнинг марказий туманларидан 2—3 километр узоқликда бўлиб турибди. ИШИД жангарилари йўқотишларга учраган ва чекинмоқда», — дея таъкидлаган генерал.

«Ал Маядин» телеканалига кўра, Ал-Фаллужага Бағдоддан нуфузли тезкор жавоб қайтариш кучларининг 5 минг жангчиси ташланган. Улар шиа тузилмаларини алмаштирди, бу асосан суннийлардан иборат шаҳарни озод қилиш чоғида мазҳаблараро келишмовчиликлар олдини олиш мақсадида амалга оширилган.

Ал-Фаллужада операция бошлангунича шаҳарни тарк этишга улгурмаган 50—90 минг атрофида аҳоли борлиги билдирилмоқда.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.