Доғистоннинг Казбек тумани Алмак қишлоғида археологлар тўрт киши, жумладан болаларнинг мурдаси бўлган ўрта асрларга тегишли сағанани аниқлади, дея хабар бермоқда «Интерфакс» республика ахборот сиёсати бошқармасига таяниб.
«Узунлиги 3 метр, эни 1,1 метр ва баландлиги ҳам тахминан шундай бўлган сағана кучли ёмғир натижасида содир бўлган ер ўпирилишидан сўнг маҳаллий аҳоли томонидан топиб олинган. Сағанага кириш жойини тўлиқ ёпиб турган плита сирғаниб кетиб, мақбара очилиб қолган. Қабристоннинг ёши 1200 йил деб тахмин этилмоқда», — деди бошқарма вакили.
Олимлар фикрича, археологик дафн ёдгорлиги эрамизнинг биринчи минг йиллиги иккинчи ярмига, эҳтимол минг йиллик чегарасига яқин даврга тааллуқли.
Уларнинг сўзларига кўра, яқин орада бошқа дафн иншоотлари ҳам топилган, аммо улар яхши сақланмаган ва кичикроқ ҳажмда бўлган. Уларнинг барчаси ер кўчиши ва тупроқ нурашидан кейин аниқланмоқда.
Изоҳ (0)