Хоразм вилоятининг Хива шаҳридаги Ичан қалъа мажмуасида 2016 йилнинг 3 июнь куни «Халфачилик: анъана ва замонавийлик жиҳатлари» мавзусидаги республика илмий-амалий анжумани ҳамда халфа қўшиқлари ижрочиларининг биринчи республика кўрик-танлови бўлиб ўтади. Бу ҳақда танлов ташкилотчиси — Ўзбекистон Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази матбуот хизмати «Дарё»га маълум қилди.

Тадбирдан кўзланган асосий мақсад — мустақилликнинг 25 йиллик байрамига тайёргарлик кўриш, халфачилик санъатини илмий ўрганиш ва уни ривожлантириш, халфачилик санъатини келажак авлодга асл ижрочилик анъанасини йўқотмаган ҳолда етказиш учун зарур қўлланмалар яратиш, ўқув семинарлари, анжуманлар ва бошқа тадбирлар ташкил этиш, Наврўз байрамлари учун халфаларнинг алоҳида дастурларини тайёрлаш.

Кўрик-танлов илмий-методик марказ ташаббуси билан «Олтин мерос» халқаро хайрия жамоат фонди, «Тасвирий ойина» ижодий уюшмаси, Хоразм вилояти ҳокимияти ҳамда Маданият ва спорт ишлари бошқармаси билан ҳамкорликда ўтказилмоқда.

Илмий-амалий анжуманда республиканинг етук олимлари ва соҳага доир илмий-тадқиқот ишлари олиб бораётган мутахассислар иштирок этади.