Дубайда 3D-принтер ёрдамида яратилган дунёдаги биринчи офис биноси очилди, дея хабар бермоқда «РБК» Бирлашган Араб Амирликлари ҳукумати сайтига таяниб.
Бино шаҳар марказида, Дубай халқаро молия маркази яқинида жойлашган. У «Келажак офиси» (Office of the Future) деб номланди. Унда лойиҳага ташаббускорлик қилган Дубай келажак фонди ташкилотининг вақтинчалик бош қароргоҳи жойлашади.
Бир қаватли бинонинг майдони қарийб 250 квадрат метрни ташкил этади. Конструкциянинг мустаҳкамлигини таъминлаш мақсадида унинг томини юмалоқ шаклда ясашди. Бино одамлар ишлаши учун тўлиқ яроқли: унга электр токи, телекоммуникациялар, сув таъминоти ўтказилган ва ҳавони кондициялаш тизими ўрнатилган.
Иншоотни қуриш учун баландлиги 6 метр, узунлиги 37 метр ва эни 12 метрли 3D-принтердан фойдаланилди. Қурилишда махсус цемент аралашмаси ҳамда БАА ва АҚШда ишлаб чиқарилган материаллар ишлатилди. Қурилиш материалларининг ишончлилиги Хитой ва Буюк Британияда синаб кўрилди.
Қурилиш тахминан 140 минг долларга тушди. Уни барпо этишда 19 кишидан иборат жамоа иштирок этди. Таъкидланишича, лойиҳани амалга оширишда меҳнат ҳақига худди шундай катталикдаги оддий бинони қуришда кетадиган харажатнинг ярми сарфланган.
Изоҳ (0)