БМТ: Сурияда қочоқлар лагерига уюштирилган авиазарба оқибатида 30 киши ҳалок бўлди

Сурия шимолидаги Идлиб вилоятида қочоқлар лагерига уюштирилган авиазарба оқибатида камида 30 киши ҳалок бўлди, 80 дан ортиқ одам яраланди. Бу ҳақда, БМТ бош котибининг гуманитар масалалар бўйича ўринбосари Стивен О’Брайен баёнотига таяниб, «ТАСС» хабар беради.

У ҳодиса юзасидан дарҳол бетараф ва мустақил текширув ўтказишга чақирди.

Суриядаги  ҳуқуқ ҳимоячилари лагерларни ўққа тутишнинг ортида ҳукумат қўшинлари турган бўлиши мумкинлигини маълум қилган.

«Дастлабки маълумотларга кўра, 30 киши ўлдирилган ва 80 дан ортиқ одам яраланган, улардан кўпчилиги аёллар ва болалардир. Ўнлаб чодир йўқ қилинган ёки уларга кучли зарар етган. Агар мазкур фуқаролик объектига ҳужум қасддан қилинган бўлса, у ҳарбий жиноят деб топилади», — деб таъкидлади О’Брайен.