Тожикистон адлия вазирлиги ҳузуридаги фуқаролик ҳолатларини қайд этиш бўлими раҳбарининг ўринбосари Жалолиддин Раҳимов мамлакатда русча қўшимчалар билан тугайдиган фамилиялар расман ман этилгани ҳақидаги хабарни инкор қилди. Бу ҳақда, «Интерфакс»га асосланиб, «Газета.ru» хабар бермоқда.

Илгарироқ ОАВ Тожикистонда русча қўшимчаларга эга фамилиялар тақиқланганини хабар қилган эди. Аммо амалдор буни тасдиқламади.

Унинг сўзларига қараганда, «Фуқаролик ҳолатлари далолатномаларини давлат рўйхатидан ўтказиш тўғрисида»ги қонуннинг 20-модда 3-банди билан боланинг фамилияси туғилган пайтида отасининг ёки онасининг фамилияси бўйича ёзилиши ёхуд отасининг исми негизида янги фамилия берилиши белгиланган.

«Шундай экан, агарда боланинг ота-онаси фамилияси ‘ов’, ‘ев’ билан тугаган бўлса, улар боласига шу фамилияни бера олади», — тушунтирди Раҳимов.

Шунингдек, у тақиқ ҳақида гап йўқлигини, ҳужжат тавсия характерида эканлигини таъкидлади.