2016 йилнинг 13—30 октябрь кунлари Баҳрайнда 19 ёшгача бўлган футболчилар ўртасида бўлиб ўтадиган Осиё чемпионатига тайёргарлик кўраётган Жасур Абдураимов бошчилигидаги Ўзбекистон ёшлар терма жамоаси Саудия Арабистонининг Ал-Хобар шаҳрида ўтказилаётган йиғин доирасида Саудия Арабистонига қарши биринчи ўртоқлик ўйинида майдонга тушди. Бу ҳақда Ўзбекистон футбол федерацияси матбуот хизмати хабар бермоқда.
Кеча, 28 апрель куни бўлиб ўтган ўйинда Саудия Арабистони ёшлар терма жамоаси 3:2 ҳисобида Ўзбекистон U-19 термасидан устун келди.
Ўйиннинг тўртинчи дақиқасидаёқ 11 метрлик жарима тўпини амалга ошириш имкониятига эга бўлган саудияликлар ҳисобни очди. Орадан 20 дақиқа ўтиб, ҳисобдаги фарқ иккитага етди – 2:0.
Ўзбекистон ёшлар терма жамоаси ҳисобни иккинчи бўлимнинг 59-дақиқасида Шароф Муҳитдинов киритган гол эвазига қисқартиришга эришди. Учрашувнинг 72-дақиқасида Саудия Арабистони ёшлари яна бир бор пенальти тепиш имконига эга бўлди ва уни аниқ амалга оширди. 79-дақиқада эса Бобир Абдухолиқов учрашувдаги сўнгги голни киритди – 3:2.
Жамоалар ўртасидаги иккинчи ўртоқлик ўйини 30 апрель, шанба куни бўлиб ўтади.
Ўртоқлик учрашуви
28.04.2016, Ал-Хобар
Саудия Арабистони U-19 – Ўзбекистон U-19 3:2
Ўзбекистон голлари: Шароф Муҳитдинов (59), Бобир Абдухолиқов (79)Ўзбекистон U-19: Умид Ҳамроев, Ҳусниддин Ғофуров, Ислом Қобилов, Хожиакбар Алижонов, Азиз Ғаниев, Илҳом Алижонов, Нурилло Тўхтасинов, Шароф Муҳитдинов, Сухроб Нуриллаев, Санжар Қодирқулов, Бобир Абдухолиқов.
Захира: Умид Эргашев, Жасур Яхшибоев, Беҳзод Ғанижонов, Ислом Кенжабоев, Абдуқодир Ортиқов, Турсун Раҳимбердиев, Билол Тошмирзаев, Миржаҳон Мирҳамдамов, Ойбек Рустамов, Усмонали Усмоналиев.
Изоҳ (0)