Сингапур Осиёнинг энг йирик молиявий маркази деб топилди ва бу борада биринчи марта Гонконгдан ўзиб кетди. Шаҳарлар Z/Yen Group Ltd. молиявий консалтинг компанияси томонидан ярим йилда бир марта тузиладиган Global Financial Centres Index (GFCI) рейтингида дунёда тегишли равишда учинчи ва тўртинчи ўринларни эгаллади. Бу ҳақда «Интерфакс» хабар бермоқда.
Жаҳон молиявий маркази мақомини Лондон ўзида сақлаб қолди. Орадаги фарқни сезиларли равишда қисқартирган Нью-Йорк иккинчи ўринни банд этган бўлса, Токио Гонконгдан анча ортда қолган ҳолда бешинчи ўринда қайд этилди.
Рейтингнинг олтинчи қаторидан Цюрих ўрин олди, кейинги ўринларни эса Вашингтон, Сан-Франциско, Бостон ва Торонто эгаллади. Дубай Яқин Шарқ молиявий марказлари орасида етакчиликни сақлаб қолди, дунё миқёсида эса 13-ўринга жойлашди.
Африкада Касабланка (дунё рейтингида 33-ўрин), Лотин Америкасида эса Сан-Паулу (43) ва Рио-де-Жанейро (44) пешқадам бўлиб турибди.
Изоҳ (0)