Ўзбекистонда хизмат кўрсатган маданият ходими, таниқли сухандон Муслимбек Йўлдошев Facebook ижтимоий тармоғидаги саҳифасида марҳум ҳамкасблари хотирасига бағишлаб ёзилган шеърини эълон қилди, дея хабар беради «Даракчи.uz».

Сухандон марҳум ҳамкасби ва яқин дўсти Абдумўмин Ўтбосаровнинг вафот этганига 100 кун тўлганини маълум қилиб, бағишловда уни ва Ўзбекистон Миллий телерадиокомпаниясида фаолият юритган Мирзоҳид Раҳимов, Раҳматилла Мирзаев, Ўктам Жобиров, Даврон Зуннунов, Ҳалима Юсупова каби сухандонларни хотирлади.

Яна қайтар гулгун баҳорлар,Қайтмас менинг қадрдонларим.Бу гуллар дилимга озорлар,Қайда отам, онажонларим.

Новдаларда яшнаган бодроқ,Чаккамда оқ, дил фиғонларим.Учиб тушган ҳар бир гуляпроқ,Яқинларим, жигаржонларим.

Бошим узра визиллар варрак,Чайқалади бирга қонларим.Бу - кетганлар руҳидан дарак,Бевақт кетган дўст-ёронларим.

Югургилар бузиб оламни,Кўзим нури болажонларим.Эшитмайди кўнгил ноламни,Қўмсаганим гулхандонларим.

Армон бу бир тўлмас тубсизлик,Етмас унга дил вайронларим.Кенгаймоқда ҳар кун ёлғизлик,Кўпаймоқда ғуж армонларим.

Қандай лобар, қанчалар латиф,Чеҳрангиз хуш, ўт забонларим.Қай маконни шодон гуллатиб,Юрибсизлар сухандонларим?

Абдумўмин ва Раҳматулло,Уста Ўктам ва Давронларим.Ҳалима, Мирзоҳид, ё, Оллоҳ,Қайда бирга бўлган онларим?

Қайтаверар бу баҳор гулгун,Қайтаверар, келмай қолмайди.Аммо қайтмас, кетганлар буткул,Ўксик дилим энди тўлмайди.

Сизлар билан эди шодлигим,Сизга эди обрў, шонларим.Сизсиз татирмикин борлигим,Кўп соғиндим, асл жонларим.

Яна қайтар гулгун баҳорлар...Қайтмайсиз а, қадрдонларим?