«ПСЖ» футбол клубининг швециялик ҳужумчиси Златан Ибрагимович енгил атлетика бўйича Швеция термаси собиқ бош мураббийи Ульф Карлссонни уни тақиқланган препаратлар қабул қилганлиги ҳақидаги айбловлари учун судга беради, деб хабар бермоқда «ТАСС».

Ульф Карлссон 2004–2006 йилларда Италиянинг «Ювентус» клубида тўп сурган швециялик ҳужумчини допинг қабул қилганликда айблаган. Карлссоннинг таъкидлашича, Ибрагимович Турин клубидаги 6 ойи давомида 10 килограмм мушак массасини тўплаган. Унинг фикрича, тақиқланган препаратларсиз бунинг уддасидан чиқишнинг имкони йўқ.

«Биз Карлссон билан судлашамиз», – деб Ибрагимовичнинг агентни Мино Райоланинг сўзларидан иқтибос келтиради Expressen нашри.

Златан Ибрагимович 2012 йилдан буён Франциянинг «ПСЖ» клубида тўп суриб келмоқда. Швециялик ҳужумчининг парижликлар билан амалдаги шартномаси жорий йилнинг ёзига қадар мўлжалланган бўлиб, келишув якунида у «ПСЖ»ни тарк этишини билдирган.

Жорий мавсумда Златан Ибрагимович «ПСЖ»нинг барча турнирларида 42 ўйинда майдонга тушиб, рақиблар дарвозасини 39 маротаба ишғол қилишга муваффақ бўлди.