Кеча, 16 март куни Ўзбекистон Миллий олимпия қўмитаси мажлислар залида жорий йил Рио-де-Жанейро шаҳрида ўтказиладиган XXXI ёзги Олимпиада ва XV Паралимпия ўйинларига тайёргарлик кўриш масалаларига бағишланган ўқув-амалий семинар ўтказилди, деб хабар бермоқда Ўзбекистон Миллий олимпия қўмитаси матбуот хизмати.
Ўзбекистон Миллий олимпия қўмитаси ҳамда Маданият ва спорт ишлари вазирлиги ҳамкорлигида ташкил этилган ушбу ўқув-амалий семинарда Республика спорт федерациялари раҳбарлари, терма жамоаларнинг бош мураббий ҳамда шифокорлари иштирок этди.
Семинарни Ўзбекистон Маданият ва спорт ишлари вазирининг биринчи ўринбосари Мурод Алиев очиб берди. У бугунги кунда бутун дунёда глобал муаммолардан бирига айланиб бораётган Зика вируси ҳамда допингга қарши кураш масалалари ҳақида тўхталиб, бу борада спортчилар, айниқса, мураббий ва тиббиёт ходимларининг касб малакасини янада ошириш зарурлигини таъкидлаб ўтди.
Шундан сўнг, Ўзбекистон соғлиқни сақлаш вазирининг ўринбосари, Республика Бош санитар врачи Саидмурод Сайдалиев ва Республика вирусология илмий текшириш институти директори Эркин Мусабоев Бразилия давлатига хос бўлган юқумли касалликлар ва Зика вируси ҳақида маълумот берди.
Ўзбекистон Миллий олимпия қўмитаси «Халқаро алоқалар ва протокол» бўлими бошлиғи Баҳодир Хусанхўжаев «Спортда допингга қарши кураш тўғрисида»ги халқаро конвенция қоидаларига риоя этиш юзасидан маълумот бериб, спортда допингга қарши кураш масалалари бўйича умумий тушунча ва халқаро антидопинг агентлиги (WADA)нинг 2015–2016 йилги янги талаблари ҳақида тўхталиб ўтди. Шунингдек, Ўзбекистон Миллий олимпия қўмитаси WADA ташкилоти билан мустаҳкам алоқаларни ўрнатгани, Ўзбекистонда агентликнинг допинг-офицерлари иштирокида ташкил этилаётган семинарлар, бунинг самараси ўлароқ 2014–2015 йилларда допинг-тестлари текширувидан ўтган 72 нафар ўзбекистонлик сопртчида бирорта ҳам қоидабузарлик қайд этилмаганлиги, 2016 йилнинг 1 январидан WADA томонидан тақиқланган препаратларнинг рўйхати терма жамоалар мураббийлари ва шифокорларига етказилгани ҳақида таъкидлаб ўтилди.
Семинарда, шунингдек, Ўзбекистон Миллий олимпия қўмитаси ҳузуридаги Республика Спорт тиббиёти илмий-амалий марказининг илмий ходими Аъзамжон Солиев спортда дори-дармонларнинг аҳамияти ва уларнинг тутган ўрни ҳақида, марказнинг илмий ишлар бўйича директор ўринбосари Искандар Мавлонов эса гинетик допинг муаммолари ҳақида маълумот берди.
Семинар давомида Ўзбекистон Давлат жисмоний тарбия институти катта илмий ходими Нелли Светличная Ўзбекистон спортчиларини 2016 йил Рио-де-Жанейрода ўтказиладиган XXXI ёзги Олимпиада ва XV Паралимпия ўйинларига тайёрлаш жараёнларини режалаштириш ва ташкил этиш масалалари тўғрисида тўхталиб ўтди.
Йиғилишда, Ўзбекистон Республикаси Президентининг 2013 йил 25 февралдаги «Ўзбекистон спортчиларини 2016 йил Рио-де-Жанейрода ўтказиладиган XXXI ёзги Олимпиада ва XV Паралимпия ўйинларига муносиб тайёрлаш тўғрисида»ги қарори ижроси ҳақида ҳам сўз юритилди. Тўрт йилликнинг энг йирик спорт анжуманига йўлланмаларни қўлга кирита олмаган бир қатор спорт турлари бўйича Республика федерациялари Бош котибларининг ҳисоботлари тингланди.
Изоҳ (0)