Техасда қамоқхона автобуси иштирокидаги ЙТҲда 20 дан ортиқ йўловчи жароҳат олди

АҚШнинг Техас штатида 31 маҳбусни 2 кузатувчи назорати остида олиб кетаётган қамоқхона автобуси кичик юк машинаси билан тўқнашди. Шахсий автомобиль ҳайдовчиси ҳалок бўлди, маҳбусларнинг 21 нафари эса жароҳат олди, деб хабар беради CBSNews.

Техас криминал адлия департаменти вакили Роберт Хёрстнинг сўзларига кўра, автобус йўловчиларининг ҳеч бири ҳаётга хавф солувчи жароҳат олмаган. Шундай бўлса-да, 21 нафар маҳбус ва бир кузатувчи маҳаллий шифохонага ётқизилган, қолганлар эса Гейтсвил шаҳридаги қамоқхона госпиталига кўрик учун олиб борилган.

Техас жамоат хавфсизлиги департаменти содир бўлган воқеа юзасидан тафтиш ўтказмоқда. Аниқланишича, пикап ҳайдовчиси қайрилиш учун тўхтаган ва қаршисидан келаётган автобусни кўрмай қолган.