Ўзбекистон «Урал Next» автомобили учун шовқинни изоляцияловчи қисмлар экспортини йўлга қўйди
«Ўз-Ханву» МЧЖ «Урал Next» автомобили учун шовқинни изоляцияловчи қисмларнинг серияли ишлаб чиқарилиши ва экспортини йўлга қўйди. Бу ҳақда «Ўзавтосаноат» АК расмий сайтида ахборот берилди.
Айтилишича, GM Uzbekistan АЖ томонидан ишлаб чиқариладиган автомобиллар учун шовқинни изоляцияловчи қисмлар ишлаб чиқаришга ихтисослаштирилган «Ўз-Ханву» 2015 йилда «Группа Газ» ОАЖнинг тармоқ заводлари билан алоқалар ўрнатди ва ҳамкорликда ишлашни бошлаган эди. Ҳамкорлик натижасида «Урал Next» автомобиллари учун шовқинни изоляцияловчи қисмларнинг серияли ишлаб чиқарилиши ва экспорти йўлга қўйилди.
Шунингдек, жорий йилда JV MAN Auto-Uzbekistan юк автомобиллари учун «Ўз-Ханву» МЧЖ томонидан шовқинни изоляцияловчи қисмларни ишлаб чиқариш ва сотишни бошлаш режалаштирилмоқда.
