АҚШ мудофаа вазирлиги вакили Марк Райт Россиянинг Су-34 самолёти Туркия ҳаво ҳудудига бостириб киргани ҳақида аввалроқ Анқара томонидан эълон қилинган маълумотни тасдиқлади, деб ёзади «РБК».
«Биз маълумотлардан хабардормиз ва кеча (30 январь куни) яна бир Россия ҳарбий самолёти Туркия ва НАТО ҳаво ҳудудига бостириб кирганини тасдиқлай оламиз», — дея Райт «РИА Новости»га маълум қилди.
Шу билан бирга, амалдор Пентагон Россияни яна бир бора Туркия ҳаво ҳудудини ҳурмат қилишга ва минтақада юқори даражадаги беқарорлик хавфини келтириб чиқарадиган хатти-ҳаракатларни бас қилишга чақиришини қўшиб қўйди.
Россия мудофаа вазирлиги эса Туркия ташқи ишлар вазирлигининг Су-34 самолёти мамлакат ҳаво кенгликларини бузганлиги ҳақидаги баёнотини сафсата деб атади.
Нашр эслатишича, 30 январь, шанба куни Туркия ташқи ишлар вазирлиги баёнот эълон қилди, унда айтилишича, 29 январь куни эрталаб Россия ҳарбий-ҳаво кучларининг Су-34 самолёти мамлакат ҳаво ҳудудига бостириб кирган. Шу муносабат билан Россия элчиси ташқи сиёсат муассасасига тегишли нотани қабул қилиб олиш учун чақирилди.
Эрдўғон эса ушбу ҳодиса туфайли Путин билан шахсан учрашиш истагини билдирди.
Ушбу мавзу бўйича НАТО бош котиби Йенс Столтенберг ҳам баёнот берди. У Россияни Шимолий Атлантика альянсига аъзо мамлакат ҳаво ҳудуди бузилишига йўл қўймаслик учун «барча зарур чораларни кўришга» чақирди.
Изоҳ (0)