Россия Тергов қўмитаси Халқаро жиноят судига 2008 йилда Жанубий Осетияда рўй берган қуролли можаро давомида содир этилган жиноятларга доир материалларини тақдим этди. Бу ҳақда қўмита раҳбари Александр Бастрикин маълум қилган, дея хабар беради Meduza.
Гаагадаги халқаро трибунал 2015 йил октябрида Россиядан Жанубий Осетия ҳудудида йўл қўйилган ҳарбий жиноятларга оид материалларни тақдим этишни сўраган. Бастрикиннинг таъкидлашича, Тергов қўмитаси томонидан текширилган ва 500 томдан зиёд ҳажмдаги материаллар ўтган йиллар мобайнида бирон бир халқаро суд томонидан қабул қилинмаган.
27 январь, чоршанба куни Халқаро жиноят суди прокурор девонхонасига 2008 йилда Жанубий Осетия ва Грузияда содир этилган жиноятларни текширишни бошлашга рухсат берди.
Расмий манбаларга кўра, 2008 йилда Россия ва Грузия ўртасидаги қуролли ихтилоф чоғида 74 нафар россиялик ва 32 нафар осетиялик ҳарбий ҳалок бўлган. Грузия томони эса 186 нафар ҳарбий хизматчи ва ички ишлар ходимини йўқотган. Тергов қўмитаси Жанубий Осетияда 162 нафар тинч аҳоли вакили қурбон бўлганини билдирган. Жанубий Осетия томони эса тинч аҳоли вакилларидан 1600 киши ҳалок бўлганини маълум қилган.
Изоҳ (0)