Ўзбекистонлик спортчилар 2015 йилги мавсумда «Рио-2016» ўйинларига 51 та йўлланмани қўлга киритди

2015 йилги спорт мавсуми ўзбекистонлик олимпиячилар учун масъулиятли мусобақаларга бой бўлди. Ўзбекистонлик спортчилар спортнинг қатор турларида 2016 йили Рио-де-Жанейро шаҳрида (Бразилия) ўтказиладиган XXXI ёзги Олимпиада ўйинларининг йўлланмалари учун баҳсларда иштирок этди. Бу ҳақда Ўзбекистон Миллий олимпия қўмитаси матбуот хизмати хабар беради.

Ўзбекистонлик спортчилар бугунги кунга қадар ўтказилган лицензион мусобақаларда «Рио-2016» ўйинларига жами 51 та йўлланмани (шундан 24 таси паралимпиячиларга тегишли) қўлга киритди.

Жумладан, бугунги кунга келиб енгил атлетика спорт турида – 8 та, бокс, оғир атлетика ҳамда байдарка ва каноэда эшкак эшиш спорт турларида – 5 тадан, сузиш, таэквондо, эркин ва юнон-рум курашларида – биттадан йўлланма мавжуд. Бундан ташқари, ўзбекистонлик паралимпиячилар енгил атлетика спорт турида – 10 та, дзюдо спорт турида – 8 та, сузиш спорт турида – 4 та, ўқ отиш ҳамда пауэрлифтинг спорт турларида – биттадан йўлланмани нақд қилиб қўйган.