Эстония полицияси раҳбари этик учун 140 еврони қонунга хилоф равишда сарфлашда айбланмоқда

Эстония полицияси ва чегара мудофааси департаменти раҳбари Эльмар Вахер давлат ҳисобидан этик ва наушниклар харид қилишда гумон қилинмоқда. Бу ҳақда Meduza хабар беради.

Вахерга бу каби айблов парламентнинг Озод партия фракцияси аъзоси ва коррупцияга қарши курашиш махсус комиссияси раҳбари Артур Тальвик томонидан қўйилмоқда. Депутатнинг сўзларига қараганда, полиция раҳбари Таллин аэропортида 299 еврога наушниклар ва 139,41 еврога этик сотиб олган. У буларни гўёки полиция формаси билан кийишини рўкач қилиб, улар учун полиция департаменти банк картаси орқали тўловни амалга оширган. Депутатнинг таъкидлашича, иш кийимини харид қилиш фақат тендер доирасида амалга оширилади.

Тальвик, шунингдек, Вахер томонидан сотиб олинган этик ва наушниклар учун харажатлар ҳужжатини тасдиқлашдан бош тортган полиция ходими декабрь ойи бошида ишдан бўшатилганлигига эътибор қаратди.

Ўз навбатида, Вахернинг аниқлик киритишича, у чегарага дала формасида бориш учун 30 сентябрда бошқарма кредит картаси ҳисобидан ходимлар кийиб юрадиган этикни харид қилган. Сабаби унда керакли ўлчамдаги форма оёқ кийими бўлмаган. Этик учун сарфланган маблағни у ойлигидан олиб қолишни сўраган ва бу декабрда бажарилган.