Францияда Фантомас ролини ўйнаган актёрнинг қабри талон-тарож қилинди

Фантомас комедия трилогиясида айни қаҳрамон ролини ўйнаган актёр Жан Маре қабри номаълум шахслар томонидан талон-тарож қилинди. Бу ҳақда Le Croix нашри хабар қилмоқда.

Жан Маренинг қабр тошидан «Соҳибжамол ва махлуқ» фильмидаги махлуқ акс эттирилган бронза ҳайкали қўпориб олиб кетилган.

Маълум қилинишича, ҳайкалнинг ўғирлангани 2016 йил 7 январь куни аниқланган. Тўрт минг еврога нархланаётган ҳайкал 35 килограмм оғирликда бўлиб, унинг баландлиги 60 сантиметр бўлган.

Бронза қуймаси ҳайкалтарошлик санъати билан ҳам шуғулланиб келган Маренинг ҳозиргача сақланиб қолинмаган ижоди асосида яратилган. Актёрнинг қабрида бу каби иккита ҳайкал, шернинг бошини акс этувчи бронза ниқоби, қанотли ва шохли катта сфинкс ҳайкали ўрнатилган эди.