Парагвайда сув тошқини натижасида фавқулодда ҳолат жорий этилди

Парагвай пойтахти ва мамлакатнинг сув тошқинидан жабрланган бешта департаментида фавқулодда ҳолат эълон қилинди. Бу ҳақда мамлакат парламенти қабул қилган қарорга асосланиб, «Корреспондент.net» хабар беради.

Фавқулодда ҳолат режимининг жорий этилиши ҳукуматга бошпанасиз қолганларга бюджетдан қўшимча маблағ ажратиш имконини беради. Ҳозирги пайтга қадар 50 мингга яқин аҳоли эвакуация қилинганлиги маълум қилинмоқда.

Табиий офатга Парагвай дарёсининг тошиб кетиши сабаб бўлди. У йил давомида учинчи марта қирғоқларидан тошмоқда. Сув сатҳи етти метрдан ошиб, 1983 йилги ҳолатга яқинлашди. Ўша йили дарё сувининг сатҳи 7,72 метрга кўтарилган эди.