Россиянинг Воронеж вилояти фуқароси чақалоқлигида ташлаб кетган онаси билан 49 йилдан сўнг судда кўришди, дея хабар бермоқда «РИА Новости» минтақа прокуратурасига таяниб.
Семилукский туман суди туман прокуратурасининг 49 ёшли маҳаллий фуқаро вояга етмаган пайтида ота-она қарамоғисиз қолгани фактини аниқлаш ҳақидаги сўровини қондирди. Текширув чоғида фуқаронинг туғилганлик ҳақидаги гувоҳномасида фақат онаси кўрсатилгани, у икки ойлигида онаси воз кечгач, болалар уйига топширилгани, шундан бери ота-она қарамоғисиз қолгани маълум бўлди.
Бироқ буни тасдиқловчи ҳужжатлари бўлмагани туфайли, вояга етганидан кейин ҳам фуқаро имтиёзларга эга бўлиш ҳуқуқидан фойдалана олмаган. У тарбияланган муассасаларнинг ҳеч бири унинг онасини оналик ҳуқуқидан маҳрум этишни сўраб судга мурожаат қилмаган. Охир-оқибат, прокуратура ариза берувчининг вояга етмаган пайтда ота-она қарамоғидан айрилгани фактини аниқлаш ҳақида судга сўров берди.
Ушбу иш бўйича далил сифатида аризачининг 72 ёшли онасининг гувоҳлик кўрсатмалари олинди. Аризачи уни ташлаб кетган онасининг тақдири ҳақида ҳеч нарса билмаган, улар судда фуқаролик ишининг кўриб чиқилиши юзасидан кўришди.
Суд далолатномаси қонуний кучга киргач, эркак тегишли имтиёзларга эга бўлиш ҳуқуқини қўлга киритади.
Изоҳ (0)