Москва давлат университети (МДУ)да илмий-тадқиқот ишлари учун масъул бўлган проректор Андрей Федянин барча илмий ишлар Федерал хавфсизлик хизмати билан келишиб олиниши кераклиги ҳақидаги ахборотни рад этди. Бу ҳақда Meduza хабар бермоқда.
Федяниннинг сўзларига кўра, олимларнинг илмий ишлари олий таълим муассасаси ходимларидан ташкил топган эксперт комиссиялари томонидан текшириб чиқилади, холос.
«Ҳеч қандай янги қоидалар жорий этилмайди», — деди Федянин. Унинг қайд этишича, эксперт комиссияси томонидан текшириш амалиёти бир неча ўн йиллардан бери мавжуд.
20 октябрь куни Nature журнали МДУнинг Физик-кимёвий биология институти ходимлари энди барча илмий ишларини ФХХ ходимларига кўрсатишлари, шунингдек, анжуманлардаги чиқишларини махсус хизмат ходимлари билан келишиб олишлари кераклиги ҳақида ёзиб чиқди.
Журналнинг мазкур ахборотини Россия Фанлар академиясининг Ахборот узатиш муаммолари институти директори ўринбосари Михаил Гелфанд ва География институти ходими Вячеслав Шупер тасдиқлаган.
Изоҳ (0)