АҚШ президенти Барак Обама 23 август, якшанба куни оиласи билан икки ҳафталик таътилдан Вашингтонга қайтди. «ТАСС» хабарига кўра, «биринчи рақамли борт» Эндрюс ҳарбий-ҳаво базасига қўнганидан сўнг, президент оиласи Marine One вертолётида Оқ уйга йўл олган.
Ўтган йилги таътилдан фарқли ўлароқ, АҚШ президенти бу сафар бемалол ҳордиқ чиқара олди. Ҳатто турли рақибларга қарши тўққизта гольф партиясини ўтказди, хусусан, бир сафар АҚШнинг собиқ президентларидан бири Билл Клинтон унга рақиблик қилди.
Бундан ташқари, у оиласи билан бирга велосипед учди, пиёда сайрларга чиқди, оқшомларда эса маҳаллий ресторанларда таом тановул қилди ва яқин дўстлариникига меҳмонга борди. «Биз вақтни чоғ ўтказдик», — деди Барак Обама.
Обаманинг 2014 йилги таътили узилиб қолганди — Ироқда ИШИД террорчилик ҳаракатининг фаоллиги, шунингдек, Фергюсон шаҳрида полиция томонидан қора танли ўсмирнинг ўлдириб қўйилиши ортидан юз берган оммавий норозиликлар сабаб у Вашингтонга эрта қайтишга мажбур бўлганди.
Маълумот учун, Обамалар оиласи ҳордиқ чиқариш учун 7 август куни Массачусетс штатининг Атлантика океани соҳилларидаги Мартас-Винъярд курортига келганди.
Изоҳ (0)