ФИФА президентлигига номзод Жанубий кореялик коррупцияга алоқадорлиги ҳақидаги айбловларни рад этди

ФИФА президентлигига номзод, Жанубий кореялик Чон Монжун ташкилотдаги коррупция можаросига алоқадор эканлиги ҳақидаги айбловларни рад этди. Бу ҳақда «ТАСС» хабар бермоқда.

Аввалроқ ОАВда ФИФАнинг этика қўмитаси Монжуннинг Гаити ва Покистон футбол федерацияларига йўналтирилган бир қатор пул ўтказмалари юзасидан суриштирув ҳаракатларини бошлагани ҳақида хабарлар пайдо бўлганди.

Хабар беришларича, пул маблағларининг бир қисми ФИФАнинг собиқ вице-президенти, 2015 йил май ойида фирибгарлик ва коррупцияда гумон қилиниб, Швейцарияда ҳибсга олинган Жек Уорнернинг ҳисоб рақамига ўтказиб берилган.

Айни вақтда, Монжуннинг ўзи 2011 йили ФИФА вице-президенти лавозимига қайта сайлана олмаган. Монжуннинг баёнотида таъкидланишича, хайрия эҳсонлари юзасидан суриштирув ҳаракатларини олиб бориш ахлоққа зиддир.

«ОАВда ФИФА Монжуннинг 2010 йили Гаити ва Покистон футбол федерацияларига, табиий офат оқибатларини бартараф этиш учун тақдим этган хайрия пуллари юзасидан текширув олиб бораётгани ҳақида хабарлар пайдо бўлди. Агар бу хабарлар рост бўлса, биз ФИФАнинг бу ҳаракатларини қоралаймиз ва этикага зид деб ҳисоблаймиз», — дейилади Монжуннинг баёнотида.

17 август, душанба куни Чон Монжун ФИФА президентлиги учун ўз номзодини қўйишини расман эълон қилди. Июль ойи охирида УЕФА раҳбари Мишель Платини халқаро футбол федерацияси раҳбари курсиси учун курашишини тасдиқлаган эди.