Японияда селфи таёқларидан фойдаланишга чеклов қўйилади

Японияда жамоат жойларида босқичма-босқич равишда селфи таёқларидан фойдаланишга чеклов қўйиш бошланади, деб хабар бермоқда «ТАСС».

Яқинда Миэ префектурасида жойлашган энг йирик кўнгилочар боғ — Nagashima Spa Land бассейнлар ва аттракционларга селфи таёқлари билан киришни тақиқлаган. Боғ вакиллари ушбу чеклов хавфсизлик нуқтаи назаридан киритилганини маълум қилган.

Июнь ойида Айти префектурасидаги Инуяма шаҳрида жойлашган маймунлар боғида селфи таёғидан фойдаланиш тақиқланган. Япония темир йўл тизимида ҳам бундай чеклов жорий қилиниши кутилмоқда. Шунингдек, Walt Disney компанияси ўзининг бутун дунёдаги боғларида селфи таёғини ишлатишга қўйган тақиқи Токиодаги Disneyland учун ҳам амал қилади.