ЖССТ Ўзбекистонга шифохоналар хавфсизлигини мустаҳкамлашда ёрдам беради
Жаҳон соғлиқни сақлаш ташкилотининг Европа бюроси Ўзбекистон Соғлиқни сақлаш вазирлигига шифохоналар хавфсизлиги индексини қўллаш бўйича миллий мутахассисларни ўқитишда ёрдам беради, деб хабар қилмоқда «Gazeta.uz».
Ташкилот мутахассиси 29 июндан 3 июлгача Ўзбекистонда бўлиб, шифохоналар хавфсизлиги индексини қўллаш бўйича 13 нафар миллий экспертни ўқитди. Экспертлар қаторига шифохоналар қурилиши ва техник жиҳозланишида тажрибаси бўлган муҳандислар, электр энергияси, сув таъминоти, канализация ва иситиш тизими билан шуғулланувчи муҳандис ва техниклар, ташхиз жиҳозларига хизмат кўрсатувчи тиббий техник ходимлар, шифохонанинг ҳар кунги фаолиятида иштирок этувчи врачлар ўрин олган.
Сўнгра гуруҳ Тошкентдаги учта шифохонага – шаҳар тез тиббий ёрдам шифохонаси, Тошкент вилояти кўп тармоқли тиббий маркази ва Республика нейрохирургия илмий марказига ташриф буюриб, уларнинг кучли ва кучсиз томонлари бўйча маълумотлар тўплади, хавфсизликни ошириш имкониятларини аниқлади. ЖССТ шаҳар клиник шифохонасига электр ўчганида операция ва реанимация хоналарига тўхтовсиз электр таъминотини амалга ошириш учун муқобил энергия манбаси бўлмагани сабабли генератор тақдим этиши айтилди.
