Японияда «ҳиссиётли» роботларнинг биринчи мингтаси бир дақиқа ичида сотилиб кетди

Японияда мингта одамсимон робот бир дақиқа ичида сотилиб кетди, деб хабар беради Softbank компанияси сайти.

Softbank компанияси томонидан ишлаб чиқарилаётган ушбу машина Pepper деб номланади, роботга буюртмалар қабул қилинмайди. Қўшимча сотувлар тўғрисида ишлаб чиқарувчи июль ойида маълумот беради.

«Pepper – биринчи одамсимон робот бўлиб, у одамлар билан бирга яшаш учун яратилган. У уй йиғиштириш, таом тайёрлаш ва бошқа шу каби қобилиятларга эга эмас. Pepper – ижтимоий робот бўлиб, у сиз билан гаплашиши, сизнинг ҳиссиётларингизни пайқаб олиб, уларга ўз муносабатини билдириши мумкин. У мустақил ҳаракатланиб яшай олади», — дейилади унинг рекламасида.

Pepperнинг бир нусхаси 198 минг йенга (1600 доллар атрофида) нархланган, бироқ роботга хизмат кўрсатиш учун тузиладиган мажбурий шартнома харидни бирмунча қимматлаштиради. Softbank ҳар ойда мингта нусхадан сотишни режалаштирмоқда.