Рамзан Қодиров Кавказда кўпхотинлиликка рухсат беришга чақирди
Чеченистон раҳбари Рамзан Қодиров Россиянинг Шимолий Кавказдаги минтақалари — Чеченистон, Ингушетия ва Доғистонда кўпхотинлиликка рухсат этилиши лозимлигини маълум қилди, деб хабар бермоқда «РБК».
«Биз Россия қонунларини бузмаймиз. ФҲДЁда фақат бир никоҳ рўйхатга олинади. Россияда 25 миллион мусулмон яшайди ва Доғистон, Чеченистон, Ингушетия сингари минтақалар учун кўпхотинлилик рухсат берилиши лозим. Бизни ёввойи деб ҳисоблайдиганларнинг ўзлари шундай, чунки бу аёлларга нисбатан тоза ва тўғри муносабатдир», — деди Қодиров.
«Кўпхотинлиликка динимизда рухсат берилган. Бу мажбурият эмас, соғлиғи ва моддий аҳволи кўтарадиганлар учун имконият. Кўпхотинлилик эркакда ўйнашлар бўлмаслиги учун керак. Ўйнашлардан ҳам соғлиқ, ҳам оилага катта зарар етади, одам ёлғон ичида яшашига тўғри келади, доимо хотини, болаларини алдайди.
Кўпчилик буни қўрқинчли деб ҳисоблайди. Мен эса бир неча ўйнашга эга эмас ҳеч бўлмаса бир эркакни кўрсатинг дейман. Бунақалар йўқ. Уларнинг барчаси хотинига ёлғон гапиради. Мен эса рафиқамни ҳеч қачон алдай олмайман. Кўпхотинлиликка қарши чиқсам — мусулмон эмасман. Мен агар инсоннинг эҳтиёжи ва имконияти бўлса, бир нечта хотини бўлиши ва Россиядаги демографик муаммони ечиши тарафдориман», — деди Чеченистон раҳбари.
