Ўзбекистон депутатлари янги таҳрирдаги «Ветеринария тўғрисида»ги қонун лойиҳасини муҳокама қилмоқда
Шу кунларда Аграр ва сув хўжалиги масалалари қўмитаси томонидан янги таҳрирдаги «Ветеринария тўғрисида»ги қонуни лойиҳаси олимлар, малакали мутахассислар ва экспертларни жалб қилган ҳолда тузилган ишчи гуруҳи томонидан иккинчи ўқишга тайёрланмоқда. Бу ҳақда Олий Мажлис Қонунчилик палатаси Ахборот хизмати хабар берди.
Ўзбекистон Республикасининг «Ветеринария тўғрисида»ги Қонуни Ўзбекистон мустақиллигининг дастлабки йилларида яъни, 1993 йилда қабул қилинган бўлиб, бугунги кун унинг айрим нормаларини қайта кўриб чиқишни талаб этмоқда.
Мазкур қонун лойиҳасининг қабул қилиниши келгусида ветеринария хизматининг ривожланишига, мамлакатда ветеринария осойишталигини таъминлаш, аҳоли ва ҳайвонларни касалликлардан ҳимоя қилиш, атроф-муҳит муҳофазасида ветеринария-санитария масалаларини ҳал этишдан иборатдир.
Қонун лойиҳасининг янги таҳририда қайд этилган камчиликларни бартараф этишга қаратилган ва ветеринария барқарорлигини таъминлашга йўналтирилган ўндан ортиқ янги моддалар киритилмоқда, – деди Аграр ва сув хўжалиги масалалари қўмитаси аъзоси Р. Қобилов.
Муҳокамалар чоғида ветеринария соҳасидаги хорижий умумий низомлар ва қонунчилик ҳужжатлари жумладан, ҳайвонлар соғлиғини ҳимоя қилиш халқаро ташкилоти томонидан тавсия қилинган ҳайвонлар соғлиғига оид халқаро қоидалар, Австралия, АҚШ, Канада ва Болтиқбўйи каби давлатларнинг қонунчилиги ҳам ўрганилиб, таҳлил қилинмоқда.
Қонун лойиҳасини тайёрлаш жараёнига тегишли давлат идораларининг вакиллари, мутахассислар, экспертларнинг жалб этилаётгани муҳокамаларнинг амалий ўтишига хизмат қилмоқда.
