Британиялик ғаввослар қиймати 34 миллион фунт-стерлингга тенг кумуш тангалар хазинасини топишди

Deep Ocean Search гуруҳи ғаввослари 2013 йил сентябрида қиймати 34 миллион фунт-стерлингга тенг бўлган кумуш тангалар хазинасини топиб, сувдан олиб чиқишган. Meduza’нинг хабар беришича, орадан қарийб икки йил ўтиб, Британия транспорт вазирлиги City of Cairo пароходидан олиб чиқилган хазина ҳақидаги ахборотни ошкор этишга рухсат берди.

Бомбейдан Буюк Британия томон сузиб кетаётган City of Cairo кемаси 1942 йили немис сувости кемаси томонидан чўктириб юборилган. Бортида 100 тонна танга бўлган кема Муқаддас Елена ороли яқинида, 5150 метр чуқурликка чўкиб кетган. Deep Ocean Search кема бўлакларини излашга киришмагунича, City of Cairo 2011 йилга қадар бедарак йўқолган деб гумон қилиб келинарди.

Хабар беришларича, City of Cairo’дан топилган тангалар қайта эритилиб, сотилган – олинган даромад эса Буюк Британия молия вазирлиги ва ғаввослар ўртасида тақсимланган.

Маълумот учун, City of Cairo пароходи 1915 йили қурилган бўлиб, 1942 йил 6 ноябрида немисларнинг U-68 сувости кемасидан отилган торпедо тегиб, чўкиб кетган. City of Cairo бортида 311 киши бўлган, уларнинг 104 нафари ҳалок бўлган.