Миллий рассомлик ва дизайн институтига янги проректор тайинланди

Камолиддин Беҳзод номидаги Миллий рассомлик ва дизайн институтида муассаса раҳбарияти, проректор, декан ва кафедра мудирлари иштирокида йиғилиш бўлиб ўтди, деб хабар бермоқда Ўзбекистон Бадиий Академияси сайти. Унда Бадиий Академия раҳбарияти қатнашди.

Кун тартибига бир масала: институтнинг илмий ишлари бўйича тайинланган янги проректорини коллективга таништириш. Бу лавозимга республика раҳбарияти томонидан олий таълим соҳасида декан лавозимида ишлаб келган доцент Хошимов Акрам Абдулазизович тайинланди. Янги проректорнинг таржимаи ҳоли, унинг фаолияти билан Бадиий Академия бош илмий котиби А.Мадраимов йиғилганларга ахборот берди.

Сўнг Ўзбекистон Бадиий Академияси раиси Акмал Нур А.Хошимовни институт фаолияти билан атрофлича таништириб, унга ўз лавозимига тезроқ киришиб кетиши ва институт жамоаси билан яқиндан муносабатларини ўрнатиб олишига ишонч билдирда ва ишларига муваффақиятлар тилаб қолди.

А.Хошимов ўз навбатида унга билдирилган ишончни оқлаш учун барча имкониятларини ишга солишини ва институт обрўсини кўтаришда тинмай меҳнат қилишини айтиб ўтди.

Йиғилишда шунингдек, институт фаолияти билан боғлиқ бир қанча масалалар устида фикр алмашилди.