Россия президенти Владимир Путин мухолифатчи Борис Немцовнинг ўлдирилганини эшитиб, «қаттиқ ғазабланди», дея хабар бермоқда Bloomberg ўз манбаларига таяниб, деб ёзади «Корреспондент.net».
«Шу билан бирга, президент терговнинг қотилликка чеченлар аралашгани ҳақидаги хабаридан янада кўпроқ ташвишга тушди», — деб ёзади агентлик яна бошқа манбасига таяниб.
Чеченистон раҳбари Рамзан Қодиров ҳодисадан кўп ўтмай, Instagram’ида Немцовнинг қотиллигида Ғарб махсус хизматлари айбдорлигини ёзган эди.
«Қотиллик ташкилотчилари Немцовнинг ўлимида бутун дунё мамлакат раҳбариятини айблашига, натижада норозилик юзага келишига умид қилган, — деди Қодиров. — Немцовнинг ўлимини Россияда ҳар қандай йўл билан ички низони келтириб чиқаришга уринаётган Ғарб махсус хизматлари ташкил қилганига шубҳа йўқ».
Чеченистон раҳбари фикрича, Киев билан муносабатлар кескинлигини ҳисобга олган ҳолда, Немцовга нисбатан «ҳукм»ни Украина махсус хизматлари қўли билан ижро этган бўлишлари мумкин.
7 март куни Россиялик сиёсатчи Борис Немцовнинг ўлдирилишида гумон қилинаётган Анзор Губашев ва Заур Дадаев Федерал хавфсизлик хизмати ва ИИВ жиноят қидирув бош бошқармасининг қўшма операцияси чоғида Москва ташқарисида қўлга олинган эди.
Эслатиб ўтамиз, Борис Немцов Москва вақти билан 27 февраль 23:15 да (Тошкент вақти билан 28 февраль 01:15 да) Москва марказидаги Москворецкий кўпригида отиб ўлдирилди.
Ички ишлар вазирлиги расмий вакили сўзларига кўра, Немцов қиз дўсти билан кўприкдан ўтаётган маҳал оқ рангли машинадан унга қарата олтита ўқ отилган. Шулардан тўрттаси мухолифатчига келиб теккан. Қотиллик чоғида сиёсатчининг ёнида бўлган қиз — 23 ёшли украиналик модель Анна Дурицкая ўз кўрсатмаларини бериб, ватанига қайтиб кетди.
Изоҳ (0)