Янги мавсумни Жанубий Кореянинг энг кучли клубларидан саналган «Ульсан Хёнде» сафида бошлайдиган Ўзбекистон терма жамоаси аъзоси Сервер Жепаров клуби билан кей-лига стартини кутмоқда, деб хабар беради «Stadion.uz».
«Ульсан» эса эртага, 8 март куни ўз уйида «ФК Сеул»ни қабул қилади. Ҳозирда клубда Serverга жуда илиқ муносабатда бўлишмоқда. Ҳаттоки жамоанинг 40 ёшли бош мураббийи Юн Жонг Хван корейс матбуотига тажрибали Сервер Жепаров ҳақида «Маҳоратли футболчи. Шу билан бирга у ростгўй ва ишончли йигит», — дея фикр билдириб ўтган.
Serverни маҳаллий мухлислар «Ўзбекистонлик сеҳргар», деб атамоқда. Кеча Жанубий Кореянинг Footbaalist нашри мухбири «Ульсан»нинг машғулотлари тугагач ўзбекистонлик футболчидан қисқача интервью олди.
Server: Кей-лигада «Сеул» ва «Seongnam» каби пойтахт ва пойтахтга яқин клубларда тўп сурганлигим сабаб Ульсан шаҳрини ҳали тўлиқ билмайман. Бу ерга келганимга эндигина бир ой бўлди. Денгиз бўйлари гўзал экан. Катта супермаркетлар ҳам кўп. Эртага аёлим Мария ва фарзандларим Вероника, Миа, Рауль ҳам бу ерга етиб келади. Умуман олганда, бу ердаги ҳолатимдан мамнунман.
Савол: Ульсанга келганингизга бир ой бўлибди. Бу ерга қанчалик мослашиб олдингиз?
Жавоб: Ҳали 100 фоиз мослашолганим йўқ. Лекин жамоадаги муҳит аъло даражада. Камчиликларимизни ўйинлар давомида тўғрилаб борамиз. «Seongnam»да бирга ўйнаган корейс футболчилар ҳам борлиги туфайли бу ерда ўзимни эркин ҳис қиляпман. «Seongnam»далигимда дам олиш вақтлари Сеулга борардик. Бу ернинг эътиборли жойларини ҳали яхши билмайман.
Савол: Бош мураббий Юн Жонг Хван ҳақида фикрингиз қандай? У ҳам яқин-яқингача футболчи эди...
Жавоб: Футболчи сифатидаги ўйинларини кўрмаган бўлсам ҳам машғулотлар жараёнида тўп билан ишлаши профессионал даражада. У ўз фикрлари ва кўрсатмаларини аниқ тушунтира олади. Мақсади бор. У менга жуда ишонмоқда ва мен ўз ўйиним билан ишончини оқлаш ниятидаман.
Савол: Бизга маълум бўлишича, сизга қишда бошқа давлатлар лигаларидан ҳам яхши таклифлар тушган. Яна кей-лигани танлашингиз сабаби нима?
Жавоб: Мен Кореяни яхши кўраман. Оилам ҳам бу ерда бахтиёр. Бу ерда тўрт фасл унчалик совуқ эмас. Таомлари ҳам ёқади. Фақат аччиқ таомларини ҳисобга олмаганда, албатта. Бу ернинг чўчқа гўшти, ўрдак гўшти жуда ёқади. Ўғлим умуман гўшт емасди. Кореяга келгач у ҳам гўшт ейишни бошлади. Бу ерда оилам учун барча нарса муҳайё. Бунинг устига кей-лига Осиёдаги энг кучли чемпионат. Кей-лигада ҳақиқий кураш бўлади. Бундай кучли лигада ўйнаш менга ёқади.
Савол: Футболда ёш ўтган сари ҳар томонлама қийинлашади. Сиз ўзингизни қандай ҳис қиляпсиз?
Жавоб: Ҳали футболчилик даврим тугаяпти, деб ўйламайман. Мана Андреа Пирло ва Хави каби футболчилар шу ёшда ҳам юқори савияда ўйнаяпти. Футбол бу фақат югуриш дегани эмас — фикрлаш деганидир. Футболда тажриба муҳим. Мен яна узоқ ва узоқ (шу жойига Server қаттиқ урғу беради) футбол ўйнаш ниятидаман. Жисмоний ҳолатимга эътиборлиман. Кей-лигада камида 37 ёшимгача тўп суриш мақсадим бор (кулади).
Савол: Осиё Кубогида Ўзбекистон ва Жанубий Корея тўқнаш келди. Шу ҳақдаги фикрларингиз.
Жавоб: Ўзбекистон ғалаба қозона оладиган ўйин бўлди. Қўшимча дақиқаларда ҳимоядаги хатолар эвазига мағлубиятга учралди. Жанубий Корея Осиёдаги энг кучли жамоалардан бири. Англия ва Германияда тўп сурадиган футболчиларингиз ҳал қилувчи ўринга эга. Мен ҳам Ўзбекистон терма жамоаси сафида 2018 йилги Жаҳон чемпионатида қатнашишни истайман. Аввало, саралаш босқичидан ўтишимиз лозим.
Савол: Бу йил «Ульсан Хёнде» билан мақсадингиз қандай?
Жавоб: Кей-лигадаги ҳар бир клубим сафида биттадан совринни олганман. Бу йил «Ульсан» билан ҳам кей-лига чемпионлиги, ҳам Кубокни қўлга киритишни истайман. Мен футболчиман. Футбол — менинг ҳаётим. Доим соврин ютиш истагида ёнаман. Бу йил майдонда жамоадошларимни самарали тўп узатишларим билан таъминлаш ниятидаман. Табиийки, голлар ҳам киритиш менинг доимий мақсадим.
Изоҳ (0)