Бугунги кунда ФИФА мақомини олган Ўзбекистон ҳакамлари сафи кенгаймоқда. ЎФФ Ҳакамлар қўмитаси бошлиғи Ноил Лутфулин бу ҳолат ҳақида ўз фикрлари билан ўртоқлашди, деб хабар беради «Stadion.uz».
«Кишини хурсанд қиладиган ҳолат шуки, ОФК томонидан бизнинг ҳакамларимизга қитъамиз бўйича энг кўп квота, яъни ўрин ажратилган, — дея гап бошлади ЎФФ Ҳакамлар қўмитаси бошлиғи. — ФИФА ҳакамлари сони бўйича ҳам Осиёда етакчимиз. Бу борада Жанубий Корея, Япония, Австралия, Саудия Арабистони ва БАА каби давлатлардан юқорида турганимиз диққатга сазовор факт. Энг муҳими, 2014 йил ҳам худди 2012—2013 йилларда бўлгани каби ўрнимизни сақлаб қолдик. Қисқаси, ҳакамлик масаласида бемалол мақтана оламиз. Айни пайт 7 нафар ФИФА рефериси, 9 нафар ассистентга эгамиз».
Шунингдек, қайд этилишича, футзалда фаолият юритаётган ФИФА мақомидаги Ўзбекистон ҳакамлари 4 нафарга етган. Аёллар футболида эса 2 нафардан рефери ва лайнсмен ФИФА байроғи остидаги мусобақаларда ишламоқда. Пляж, яъни соҳил футболида ўтган йили жаҳон чемпионати ўйинларида ҳам ишлаган Бахтиёр Намозов бир неча йилдан буён ҳакамлик қилиб келмоқда.
«ФИФАнинг элит тоифасига кирувчи ҳакамларимиз алоҳида мавзу, — деди Ноил Лутфулин. — ‘А’ тоифасида Равшан Эрматов, Валентин Коваленко ва Владислав Сейтлин фаолият юритяпти. ‘Б’ тоифасида Илгиз Tantaшев ва Азиз Асимов, ‘С’ тоифасида Шерзод Қосимов бор».
Ноил Лутфулин таъкидлаганидек, Австралиядаги Осиё кубогига Ўзбекистондан бир йўла 2 та бригада таклиф этилганди. «Бунақаси Осиё кубоги тарихида ҳали кузатилмаган, — деб қайд этди Лутфулин. — Тўғри, Коваленко саломатлигига боғлиқ муаммолар туфайли Австралияда ҳакамлик қилгани йўқ. Лекин факт шуки, ОФК биздан 2 та бригада чақирди — бу кўп нарсага далолат.
Қолаверса, ОФК Ҳакамлар департаменти Равшан Эрматовга Осиё кубоги — 2015 очилиш ўйинини ишониб топширди. Энди Равшан ҳам Осиё кубоги, ҳам жаҳон чемпионати очилиш ўйинларини бошқарган ҳакам сифатида тарихда қолди».
Изоҳ (0)